ఓం శ్రీ కృష్ణ పరబ్రహ్మణే నమః
ఓం శ్రీ కృష్ణ పరబ్రహ్మణే నమః 🙏
శ్రీకృష్ణ పరమాత్మ తన యోగమాయను మార్కండేయునకు చూపించడానికి వటపత్రంపై ఎడమకాలి బొటనవ్రేలును నోటిలో పెట్టుకొని శయనిస్తున్నట్లు దర్శనమిచ్చారు.
వటపత్రం పైనే ఎందుకు శయనించాడు అనగా ఈ విధంగా చెప్పారు.
జంతువులలో గోవు ఎంత శ్రేష్టమో...
చెట్లలో మఱ్ఱిచెట్టు అంత శ్రేష్ఠమైనది.
మఱ్ఱిచెట్టునే వటవృక్షమని, న్యగ్రోధమని అంటారు.
ఈ వృక్షముది కనీకనబడని విత్తనమట.
మిగతా మొక్కల్ని నాటినట్టుగా ఈ మఱ్ఱిమొక్కను ఎవరూ నాటరు.
ఇది స్వయంభువంగా వెలుస్తుంది.
దీనికి ఎన్నో కొమ్మలు, ఊడలు ఉండి అనేక చెట్ల గుంపులా విస్తారముగా ఉంటుంది.
అంతచెట్టు చిరువిత్తనంలో ఉన్నట్లే... పరమాత్మ కూడా అణువణువులోనూ ఉన్నాడని,
ఆ చెట్టు విస్తారంగా వ్యాపించినట్లే... పరమాత్మ కూడా బ్రహ్మాండమంతా తానే వ్యాపించి ఉన్నాడని,
ఇది స్వయంభువంగా మొలకెత్తినట్లే... పరమాత్ముడు కూడా స్వయంభువుడుగా అవతరించాడని, ఈ చెట్టుని గమనిస్తే అర్ధమౌతుంది.
అందుకే దక్షిణామూర్తి మౌనంతో ఆత్మతత్త్వాన్ని వెల్లడించింది ఈ చెట్టు క్రిందనేనని అంటారు.
ప్రళయకాలంలో మార్కండేయునకు ఈ లీల చూపడంలో సమస్త సృష్టి మాయేనని, చిట్టచివరికి అంతా తనయందే లయమౌతుందని, అది గ్రహించమని జ్ఞానమార్గమును చూపించాడు.
బాలముకుందాష్టకం🙏
కరారవిందేన పదారవిందం ముఖారవిందే వినివేశయంతం ।
వటస్య పత్రస్య పుటే శయానం బాలం ముకుందం మనసా స్మరామి (1)
సంహృత్య లోకాన్వటపత్రమధ్యే శయానమాద్యంతవిహీనరూపం ।
సర్వేశ్వరం సర్వహితావతారం బాలం ముకుందం మనసా స్మరామి (2)
ఇందీవరశ్యామలకోమలాంగం ఇంద్రాదిదేవార్చితపాదపద్మం ।
సంతానకల్పద్రుమమాశ్రితానాం బాలం ముకుందం మనసా స్మరామి (3)
లంబాలకం లంబితహారయష్టిం శృంగారలీలాంకితదంతపంక్తిం ।
బింబాధరం చారువిశాలనేత్రం బాలం ముకుందం మనసా స్మరామి (4)
శిక్యే నిధాయాద్యపయోదధీని బహిర్గతాయాం వ్రజనాయికాయాం ।
భుక్త్వా యథేష్టం కపటేన సుప్తం బాలం ముకుందం మనసా స్మరామి (5)
కలిందజాంతస్థితకాలియస్య ఫణాగ్రరంగేనటనప్రియంతం ।
తత్పుచ్ఛహస్తం శరదిందువక్త్రం బాలం ముకుందం మనసా స్మరామి (6)
ఉలూఖలే బద్ధముదారశౌర్యం ఉత్తుంగయుగ్మార్జున భంగలీలం ।
ఉత్ఫుల్లపద్మాయత చారునేత్రం బాలం ముకుందం మనసా స్మరామి (7)
ఆలోక్య మాతుర్ముఖమాదరేణ స్తన్యం పిబంతం సరసీరుహాక్షం ।
సచ్చిన్మయం దేవమనంతరూపం బాలం ముకుందం మనసా స్మరామి (8)
-- సత్య వాడపల్లి
Comments
Post a Comment